Komandant

Komandant, ma jep kapuçin tënd
Ta kem  hajmali kur gjendem në radarin e ushtarëve të tu.
Komandat, m’i jep dylbitë tua
Ma jep brezaren, revolen me gjithë plumba
Ta pi një makiato pa plumb…
Vetëm çizmet mbaji
Se nuk e kemi numrin e njëjtë

Advertisements

E VOGLA, E MADHJA IME

Kosova e vogël sa vogëlsia ime
Marshimet për të mund të bëhen
Prej secilës shtëpi
Prej secilës rrugë
Prej secilit qytet
Edhe në këmbë.
Kosovë, vogëlsia ime e madhe

Jeta

Ulje dhe zbritje çmimesh është jeta
Ndonjëherë edhe vajtje në banjo ëmbëlsisht,
Një foto pranë ujit dhe tryeza e shtruar
Me një buzëqeshje detyrimisht.

Të tjera radhë nuk hynë këtu
Ato s’i bëjmë për të tjerë,
Se janë provime ku biem kuturu
Dhe po i prekëm pak lëshojnë erë.

Tutkuni i Urukut

Mos e humb ditën me barin e përjetësisë,
Lindja një ditë do të luftojë me Perëndimin
me që Perëndimi po lufton me Lindjen.
Pse nuk e di ç’është vdekja?
Zgjidhe ushkurin dhe vdis
ti gjysmëkafshë e stepës
dhe ktheja Urukut qetësinë.
Ti… ti s’je për asfalt.

Për poezinë e popullit tim

Poezia e popullit tim asht ma e mira në botë
Aty asht vargu për kopilin dhe për kopilin te dera
Për kambët e arushës
dhe për një pordhë që ende pshitllet nëpër tirq.
Poezia e popullit tim kurrë s’ka vetë per forma letrare,
Për varg, për rime, për strukturë.
Ka renditun mendimet sipas kohës
Dhe kurrë s’i ka p’shurrë qershitë.

//www.facebook.com/attachments/messaging_upload.php?id=MessagingInlineComposer

Sheshi

Derisa të rregullohet sheshi
Do t’i bojkotojmë daljet,
Do t’u ikim atyre
Që nuk na presin
Dhe këtij vendimi nuk i sprapsemi.

Derisa të rregullohet sheshi
Do t’i bojkojmë daljet
Vetëm nëse ndodh diçka e papritur
Dhe populli të thërrasë “Kosova Republikë!”